Sardor Rahimxon: “Konsertimga samolyotda uchishimni ko‘rgani emas, qo‘shig‘imni tinglagani kelishsin”

“Muloqot” saytlar tarmog‘ining “Muloqot intervyu” loyihasi navbatdagi sonida Sardor Rahimxon mehmon bo‘ldi. “Muloqot” a’zolari tomonidan Intervyu.uz saytida qoldirilgan savollar orasidan hali hech qayerda so‘ralmagan hamda dolzarb mavzudagilari tanlab olinib, Sardor Rahimxonga berildi.
Xabaringiz bor, “Muloqot intervyu” — video loyiha. Hozircha, suhbatning yozma shaklini o‘qishingiz mumkin. Video talqini esa tez kunlarda, taqdim etiladi. O‘tkazib yubormang. ;)
San’atga kirib kelgan vaqtingizdagi ilk ustozingiz kim bo‘lgan? O‘zingizga kimlarni ustoz deb bilasiz?
Sardor Rahimxon: San’atga kirib kelganimda rahmatli Saidazim Murodxonov ustozlik qilgan. Keyinchalik Iqbol aka Muhammadjonov san’at sohasidan saboq berdi. Mana shu inson hozirgi kunga qadar ustozim, aksariyat qo‘shiqlarimning muallifidir. Shuningdek, ustozimni hayotdagi yo‘lboshchim, qadrdonim, do‘stim, deb hisoblayman.
Yoshlikdagi orzularingiz haqida aytib o‘tsangiz.
Sardor Rahimxon: Qaysi kasbni egallashimdan qat’iy nazar, taniqli katta odam bo‘laman va hammaga yaxshilik ulashaman deb orzu qilganman. Qaysidir ma’noda orzularimga erishdim desam mubolag‘a bo‘lmaydi. Katta odam bo‘lmasam ham, qaysidir ma’noda barchaga yaxshilik qiladigan, qo‘shiqlari bilan ezgulik ulashuvchi taniqli inson bo‘ldim. Demak, orzularim amalga oshibdi.
Sardor aka chet el san’atkorlaridan kimlarni qo‘shiqlarini sevib tinglaysiz?
Sardor Rahimxon: Enrike Iglesias, Sami Yusuf, Ibrohim Tatlisas, Riannaning qo‘shiqlari yoqadi. Umuman olganda qo‘shiqchidan ko‘ra, qo‘shiqqa ko‘proq e’tibor beraman. Xoh u mashhur, xoh yangi qo‘shiqchi bo‘lsin, agar uning qo‘shig‘i yaxshi bo‘lsa eshitaveraman.

Muxsinjon Asqarov

Avval “Intelektual ring” o‘yinini olib borgansiz. Nima sababdan xonandalikka almashtirdingiz?

Sardor Rahimxon: “Intellektual ring”da ishlashim tasodifan bo‘lgan. Radioda ishlab yurgan paytlarimda ovozim va ko‘rinishim shu ko‘rsatuv ijodkorlariga ma’qul kelgan va meni taklif qilgan. Televideniye ham katta maktab bo‘lgani uchun rozi bo‘lganman.

farrux nomozov

Siz G‘uzorda konsert bergandingiz. Iltimos, sevimli jamoam – “Sho‘rtan” haqida qo‘shiq yozsangiz.

Sardor Rahimxon: O‘zbek futboli haqida qo‘shiq kuylash niyatim bor. Lekin, aynan bir jamoa haqida qo‘shiq kuylamoqchi emasman. Chunki, bittasi haqida kuylasam ikkinchisi xafa bo‘lib qolishi mumkin. Menimcha, san’atkor barchaning ko‘nglini birdek ola bilishi kerak.

abbos.azizov

Assalomu alaykum! Inson fazilatlaridan qaysi birini ko‘proq hurmat qilasiz?

Sardor Rahimxon: Samimiylik, to‘g‘riso‘zlik, lafzi halollik, saxiylik, kechirimlilik, — umuman, jamiki yaxshi fazilatlari bor insonlarni hurmat qilaman.

Kamilka Karamelka

Assalomu alaykum, Sardor aka! Agar, muxlislaringizdan biri sizga koreys tilida ashula aytishingizni iltimos qilsa, o‘sha muxlisingiz uchun koreys tilida kuylagan bo‘larmidingiz?

Sardor Rahimxon: Ha, albatta kuylagan bo‘lar edim. Koreys tilida qo‘shiq kuylash rejamda bor.

Mike Ross

Birinchi yodlagan she’ringizni eslay olasizmi?

Sardor Rahimxon:

Qorbobomiz oppoq,
Peshonasi yalpoq,
Hassasi uzunchoq,
Ko‘proq bering o‘yinchoq.

Menimcha, birinchi yodlagan she’rim shu bo‘lsa kerak.

Dostonbek Nazirbekov

Sanjar aka, sizni do‘stlaringiz va hamkasblaringiz o‘z ismingiz bilan chaqirishadimi yoki taxallusingiz bilanmi?

Sardor Rahimxon: Hamkasblarim Sardor deb chaqirishadi. Uydagilarim, qarindosh va sinfdoshlarim Sanjar deb chaqirishadi.

musulmanov

She’rlar to‘plamingizni qayerdan olsa bo‘ladi? Nimaga disklaringizni topib bo‘lmaydi?

Sardor Rahimxon: Disklarim do‘konlarda sotiladi. “Faqat muhabbat” deb nomlangan she’riy albomim sotuvda bor. Ularni internetdan ham topish mumkin.

Ruslan .Ruslan

Men Rayhonning ham ashaddiy muxlisiman. Rayhon bilan kuylagan hamma qo‘shiqlaringiz zo‘r chiqqan. Duet kuylash borasida ham bir-biringizga juda mos tushasiz. O‘zingizga qaysi xonanda bilan aytgan duetingiz yoqadi? Eng yoqqan duetdoshingiz kim?

Sardor Rahimxon: Menga eng yoqqan duetdosh Rayhon. U bilan birga kuylagan “Abadiy” duet qo‘shig‘imiz juda ma’qul bo‘lgan.

Bakhodur

Iltimos, onajonlar uchun bir tarona kuylab bersangiz.

Sardor Rahimxon: Onajonlar uchun qo‘shiq kuyladim. Yangi “Tanhoginam” nomli albomimdan o‘rin olgan bo‘lib, nomi “Onajon”. Shu qo‘shiqni barcha o‘zbek onalari uchun ijro etganman.

MoviyguL Abdullaeva

Sardor Rahimxonning qo‘shiq aytish va suxandonlikdan boshqa yana qanday xususiyatlari bor?

Sardor Rahimxon: Yaxshi jihatlarim haqida yaqinlarimdan so‘rash kerak. Agar men o‘zim haqimda gapirsam, unda bu maqtanchoqlik bo‘lib qoladi.

samandar946

Qaysi jahon xonandasi bilan qo‘shiq kuylashni xohlaysiz?

Sardor Rahimxon: Enrike Iglesias, Sami Yusuf bilan bajon-u dil duet kuylagan bo‘lar edim. Umuman olganda, o‘z o‘rniga, o‘z mavqeiga ega bo‘lgan har qanday qo‘shiqchi bilan duet kuylashga tayyorman.

BAHTIYOR

Jizzaxdagi muxlislaringiz sizni intizorlik bilan kutib qoldi. Qachon tashrif buyurasiz? Sizni kutib qolamiz!!!

Sardor Rahimxon: 6—7-fevral kunlari bo‘lib o‘tadigan yakkaxon konsert dasturimdan so‘ng bahor, yoz fasllarida, albatta, gastrol safarlari uyushtirmoqchiman. Safar davomida Jizzaxga ham boramiz. Jizzax haqida qo‘shiq kuylaganim bejiz emas. Bu jizzaxlik muxlislarimga bo‘lgan hurmat va muhabbatni bildiradi. Imkoniyatdan foydalanib jizzaxliklarga alangali salomlar. Muxlislarning kutayotgani bizni behad xursand qiladi.

Iqboliddin

“Seni ko‘ngling olgan kim?” taronasiga klip suratga olishni qachonga rejalashtiryapsiz?

Sardor Rahimxon: Bu tarona men uchun muhim ahamiyatga ega. Yaqin kunlarda klip suratga olish ishlarini boshlaymiz.

Bek Uzbekistan

Sizning xorij mamlakatlaridan birida suratga olinayotgan klipingiz hamda u klipning suratga olish jarayonidan fotojamlanma va reportajlarni guvohi bo‘lgan edik. Ammo ikki yil bo‘libdi hamki, hali klipni ko‘rmadik. Buning sababi nimada?

Sardor Rahimxon: Qaysi klip haqida savol berganingizga tushunmadim. Hamma kliplarim muxlislarga taqdim etilgan. Ularning barchasi internetda ham bor.

germanya-91

Qaysi sport turi bilan shug‘ullanasiz?

Sardor Rahimxon: Sport bilan shug‘ullanishga vaqtim yetarli emas. Biroq shug‘ullanishni juda ham xohlayman.

BunyOdxOn Saidov TaNur Guruhi (Yulduzcha)

“Mango” guruhi yigitlari sizning shogirdlaringizmi?

Sardor Rahimxon: Yo‘q. Ammo “Mango” guruhidagi “Bayon” guruhining sobiq a’zosi Oybek shogirdim.

“Muloqot intervyu” jurnalisti Zuhra Yunusova tomonidan berilgan savollar:

Yaqinda taqdim etadigan konsert dasturingiz haqida nima deya olasiz?

Sardor Rahimxon: Avvalambor, konsertning eng muhim jihati bu to‘rt yil davomida kutilganligi. Qolaversa, bu konsert mening hayotimga bog‘liq va shunisi bilan boshqa konsert dasturlarimdan farq qiladi. Qo‘shiqlarim asosan avtobiografik: o‘zim, ota-onam, farzandlarim haqida bo‘ladi.

Konsertda nechta qo‘shiq ijro etiladi? Ulardan nechtasi yangi?

Jami 21 yoki 22 ta. Shularning orasidan 7—8 tasi yangi bo‘ladi. Yana bir antiqa va kutilmagan duet tayyorlayapmiz. Hozir bu haqda ayta olmayman. Vaqti kelib, konsertga tashrif buyuruvchilarning o‘zlari guvoh bo‘ladi.

Kutilmagan duetdan tashqari, yana qanaday “syurpriz”lar tayyorlayapsiz?

Men balandparvoz gaplardan qochaman. Konsertimga maqtagan gaplarim uchun odamlar tashrif buyurishini xohlamayman. Xohlaymanki, meni sog‘ingan muxlislarim qo‘shiqlarimni eshitish uchun kelsin. San’atkor o‘zining ovozi, qo‘shig‘i bilan muxlislarini ushlab tura olishi kerak, qanaqadir dekoratsiya, intrigalar bilan emas. Ana shunda u haqiqiy san’atkor bo‘ladi. San’atkor bir o‘zi sahnani to‘ldirib turishi kerak. Mana shunaqa san’atkorlardan Yulduz Usmonovani juda ham hurmat qilaman. Bitta o‘zi bo‘lsa ham, shu inson butun “Istiqlol” san’at saroyini to‘ldirib tura oladi. Chunki shu insonning fayzi bor, savlati bor, yillar davomida orttirgan obro‘yi bor.

Men ham shunga intilaman. Konsertimga kelyotgan muxlislarim dekoratsiya, raqslar, samolyotda uchishim, qo‘nishimni emas, mening qo‘shig‘imni eshitish, o‘zimni ko‘rish uchun kelsin. Men sirkda ishlamayman-ku, tepadan tushib kelsam. Men xonandaman: ovozim bor, qo‘shiq orqali aytadigan dardlarim bor. Qolaversa, bunaqa narsalar odamni chalg‘itadi.

Bular mening shaxsiy fikrlarim. Albatta, zamonaviy qo‘shiqlarda sahnani raqslar bilan to‘ldirib turish kerak. Ammo mening aksariyat qo‘shiqlarim bunday yo‘nalishda emas.

Suhbat yakunida Abbos Azizovning inson fazilatlari haqidagi savoli “Eng yaxshi savol” deb topildi. Unga Sardor Rahimxon konsertiga ikkita bilet topshiriladi.

Sardor Rahimxonning 6—7-fevral kunlari taqdim etiladigan konsert dasturida omad tilaymiz.

manba: daryo.uz

Ñìîòðåòü îí ëàéí: